Шарапова следната недела се враќа на терените

Поранешната најдобра тенисерка на светот Марија Шарапова најави дека следната недела ќе учествува на турнирот во кинескиот град Вухан. Таа надвор од терените е од почетокот на јули месец годинава, кога во полуфиналето на Вимблдон загуби од Серена Вилијамс.

• Се радувам што ќе се вратам на теренот. Напорно тренирав и едвај чекам повторно да играм, изјави за Би-Би-Си Шарапова.

Шарапова без настап на турнири беше околу два и пол месеци и притоа го „прескокна“ УС Опен, кога учеството на турнирот го откажа на еден ден пред почнувањето. Во моментов Шарапова се наоѓа на третото место на ВТА листата, а таа ја прифати специјалната покана од организаторите на турнирот. Руската тенисерка досега има освоено 35 титули во кариерата од кои пет Грен слем турнири.