Серена спортска личност на годината

Американската тенисерка Серена Вилијамс е прогласена за спортска личност на годината во изборот на магазинот „Спорт Илустрејтед“. Серена е првата спортистка која самостојно ја добила оваа награда во последните 30 години. Покрај Серена во конкуренција за спортска личност на годината беа Новак Ѓоковиќ, Стеф Кари, Усеин Болт и Лионел Меси.

 

Серена оваа година освои три грен слем титули (Аустралијан Опен, Ролан Гарос и Вимблдон), забележа 53 победи и само три порази. Исто така таа седми пат ја понесе и наградата за тенисерка на годината.

 

„Спорт Илустрејтед со оваа награда ја препозна мојата посветеност, одлучност и труд, ова ми дава надеж дека можам да бидам уште подобра. Но како што јас велам за успех е потребно да имате цело село, ова не можеш да го постигнеш сам. Ова е големо достигнување не само за мене туку и за целиот мој тим и за сите мои навивачи. Не можам да опишам што значи за мене ова признание“, рекла Серена.

 

Американката е првата жена која самостојно ја освоила оваа награда по атлетичарката Мери Декер во 1983 година. Поранешниот кошаркарски тренер Пат Смит го подели признанието со тренерот на Дјук и селекторот на кошарарите на САД Мајк Кжижевски во 2011 година.