Се стабилизира бројот на новозаразени со коронавирусот во Словенија

Според податоците на Националниот институт за јавно здравје во Словенија се потврдени 43 нови случаи на лица заразени со коронавирусот, јави дописникот на МИА од Љубљана.

Со овие 43 лица, вкупниот број на инфицирани сега изнесува 977.

Поради Ковид-19 хоспитализирани се вкупно 109 лица, што претставува намалување во однос на вчерашниот ден, а на одделот за интензивна нега се лекуваат само 31 пациент.

Според надлежните, изминативе неколку денови има стабилизација на бројот на новозаразени лица, а се намалува бројот на оние на кои им е потребно болничко лекување како последица од коронавирусот.

Досега како последица од Ковид-19 во Словенија починаа 22 лица, од кои повеќето се повозрасни луѓе со хронични болести.