Се отвори најголемиот центар за вакцинација во Белгија

Официјално денеска е отворен најголемиот центар за вакцинација во Белгија, иако не функционира уште со полн капацитет поради недостаток на вакцини, јави дописничката на МИА од Брисел.

Центарот се наоѓа во главниот град Брисел близу фудбалскиот стадион Хејзел. Оваа недела се очекува да бидат вакцинирани 4.800 лица со вакцината на АстраЗенека, пред сѐ медицински персонал, лекари, забари и медицински сестри под 55 годишна возраст.

Меѓутоа Белгија сѐ уште не располага со доволно дози вакцини за да може центарот да работи со полн капацитет.

Властите се надеваат дека во наредните денови ќе се интензивира ритамот на вакцинација за 5.000 лица дневно како што е предвидено.

Граѓаните на Брисел можат да изберат каде и кога ќе се вакцинираат, во другите региони на Белгија ваков избор не им се овозможува на граѓаните.