СДСМ бара оставка од градоначалникот Трајановски поради поплавите

Советничката група на СДСМ во Советот на Град Скопје денеска побара оставка од скопскиот градоначалник Коце Трајановски бидејќи, според нив, тој е одговорен за последиците од невремето што на 6 август го зафати скопскиот регион.

Координаторот на Советничката група на СДСМ и коалициските партнери во Советот на Град Скопје и потпретседател на СДСМ, Дамјан Манчевски денеска обвини дека жртвите од невремето се последица на непреземањето соодветни мерки за заштита од поплави и на недостатокот од инвестиции во патната инфраструктура.

- Жртвите од 6 август се директна последица на непревземање мерки за заштита пред поплавите и недостаток на инвестициии во инфраструктура, целосно погрешното дејствување за време на поплавата и тоталната неспособност за справување со последиците по поплавата, рече Манчевски.

Според СДСМ, градоначалникот Трајановски ништо не презел за да го заштити градот од елементарни непогоди, иако постоел план за заштита и спасување  во кој Скопје било означено како место со висок ризик на загрозеност од поплави. СДСМ обвини и дека Трајановски знаел за опасноста од невреме бидејќи за тоа информирале метео - порталите, како и дека е потребна брза евакуација на населението и затворање на обиколницата, но оти ништо не е преземено.

СДСМ побара соодветна парична помош за поплавените семејства и парите од Панорамското тркало во вредност од 90 илјади денари да се пренаменат за итна помош на настраданите