Самостојна изложба на Бурхан Ахмети во Чифте амам

Самостојна изложба на македонскиот уметник Бурхан Ахмети денеска ќе биде отворена во Чифте амам во Скопје.

Изложбата ќе биде отворена до 17-ти декември.

Делата на Бурхан Ахмети се карактеризираат со изворна афирмација на сложените графички техники, како сува игла, акватинта, линорез, литографија, дрворез, бакрорез, монотипии, па сè до дигиталната графичка дисциплина, како и со нагласена интелектуалност во пристапот кон визуелната уметност, оценува кустосот Татјана Бундалевска, од Националната галерија на Македонија.

Ахмети е роден на 18 август 1978 година во гостиварското село Дебреше. Член на ДЛУМ, добитник неколку награди, учесник на околу стотина ликовни колонии, има реализирано многубројни самостојни и групни изложби.