Руте: Самитот на НАТО во Анкара беше „исклучително успешен“

Самитот на НАТО во Анкара беше „исклучително успешен“, изјави денеска генералниот секретар Марк Руте во своето обраќање по состанокот.

– Пораката од овој самит е едноставна: НАТО испорачува резултати. Пред една година им се заблагодаривме на сојузниците кои донесоа историски одлуки за зајакнување на нашиот сојуз. Овде во Анкара, каде што бевме одлично пречекани од претседателот Ердоган, покажавме дека тие обврски сега се исполнуваат – рече Руте за време на прес-конференцијата по самитот.

Сопствените инвестиции ширум алијансата продолжуваат да растат, се испорачуваат нови капацитети, а индустријата го проширува производството, рече Руте, додавајќи дека европските сојузници и Канада преземаат „голема одговорност“ за заедничката безбедност.

– Сојузниците го открија значајниот напредок кој е веќе постигнат кон инвестирање на 5 отсто од БДП во одбраната до 2035 година. Веќе достигнавме 4 проценти, на само една година од почетокот на овој 10-годишен проект. Така што, моментумот е јасен. Сојузниците продолжуваат да ги зголемуваат и основните одбранбени трошоци и пошироките инвестиции кои ја зајакнуваат нашата безбедност – додаде тој.

– Тие ги создаваат капацитетите што ги бараат нашите одбранбени планови и го зголемуваат својот придонес во колективното одвраќање и одбрана на НАТО. Ова не е едноставно прашање на поголемо трошење пари. Станува збор за осигурување дека нашите вооружени сили го имаат она што им е потребно за да ги зачуваат безбедни нашите една милијарда луѓе во еден поопасен свет – истакна тој.

Алијансата сега се фокусира на испорачување резултати во однос на зацртаните цели, рече Руте, додавајќи дека тој напор ќе бара побрзо производство, помалку бирократски пречки, посилна отпорност, поголеми инвестиции во иновации и поблиска соработка со партнерите.

– Форумот на одбранбената индустрија во рамките на самитот на НАТО ја покажа решеноста на владите и на индустријата да соработуваат со најголема решителност. А бројките се неверојатни, вклучувајќи над 50 милијарди долари во нови договори за набавка за само еден ден. Лансиравме и нова голема иницијатива, ’Дронови на НАТО‘ (NATO’s Drones), во која сојузниците ќе инвестираат 40 милијарди долари … во следните пет години – рече тој.

Забележувајќи дека постојат „големи“ договори меѓу американските и европските одбранбени компании, Руте рече дека објавените инвестиции и индустриски обврски ќе ја засилат колективната одбрана и ќе ги поддржат иновациите, растот и вработувањето на стручен кадар ширум алијансата.

Повикувајќи инвестициите и индустриските обврски да продолжат, тој објави дека земјите на НАТО „преземаат историски чекор“ за зајакнување на својот синџир за снабдување со гориво.

– Додека сојузниците продолжуваат да ги финализираат деталите, знаеме дека оваа инвестиција од 27 милијарди евра (30,8 милијарди долари) ќе ја модернизира нашата постојна инфраструктура за складирање и дистрибуција на гориво и ќе поддржи нови капацитети, вклучително и нафтоводи кон источниот дел на алијансата – рече тој.

Руте додаде дека НАТО работи и на поефикасно користење на технологијата, вклучително и преку усвојување на напредни ВИ модели и развој на интероперабилна трансатлантска борбена платформа. Тој рече дека кредибилното одвраќање и одбрана зависат од реалната испорака, додавајќи дека алијансата веќе го прави тоа.

Тој рече дека сојузниците исто така ја потврдиле непоколебливата поддршка на НАТО за Украина додека војната со Русија продолжува. Според Руте, сојузниците ветиле дека ќе обезбедат најмалку 70 милијарди евра (79,8 милијарди долари) во воена опрема, помош и обука за Украина оваа година, како и ист износ следната година, додека истовремено продолжуваат со напорите за постигнување мир.

Руте рече дека самитот покажал оти алијансата е „посилна од кога било“, обединета и подготвена да ја брани секој педа од територијата на НАТО, јави Анадолија.

Тој наведе дека сојузниците ја потврдиле својата посветеност на колективната одбрана според членот 5, според кој нападот врз еден сојузник се смета за напад врз сите.

Тој додаде дека единството, солидарноста и колективната сила на НАТО остануваат основа на мирот, безбедноста и просперитетот. Лидерите исто така се согласија за потребата од модернизација на алијансата и подготовка за иднината, вклучително и преку посилна Европа и посилно НАТО.

Европските сојузници и Канада, работејќи заедно со Соединетите Американски Држави, преземаат поголема одговорност за одбраната на сојузот преку големи инвестиции и индустриски договори од двете страни на Атлантикот. Тој го опиша ова поместување како дел од „НАТО 3.0“ (NATO 3.0) – алијанса која продолжува да се приспособува и да испорачува за да ги зачува безбедни своите една милијарда луѓе.

МИА