Романија ги истражува киднапирањата на десетици лица, кои биле држени како робови

Романското обвинителство ги истражува киднапирањата на десетици лица, меѓу кои и деца, кои биле држени против своја волја и принудени да работат или питачат.

Обвинители од службата за борба против организиран криминал денеска изјавија дека водат истрага за околу 40 лица, кои се осомничени дека во последните осум години примамиле речиси 40 лица со посебни потреби или многу сиромашни, кои ги принудувале да сечат дрва, да питачат или да се грижат за животни.

Некои од жртвите биле киднапирани од железничките и автобуските станици, пред цркви или од нивните домови. Понекогаш биле држени врзани или заклучени, биле малтретирани и не добивале доволно храна, па дури биле и принудувани физички да се пресметуваат меѓу себе поради забава.