Промовиран Индекс за младински развој во Македонија

 Коалицијата на младински организации СЕГА денеска официјално го промовира Индексот за младински развој во Македонија што ќе го бележи напредокот на граѓанското учество на локално ниво.

Индексот е изработен во рамки на проектот „Зајакнување на младинската вклученост во локалните заедници“. 

- Оваа алатка е прва од ваков тип кај нас во Македонија и ќе го бележи напредокот на граѓанското учество на локално ниво. Индексот ќе преставува ресурс со кој граѓанските организации полесно ќе ги адресираат актуелните потреби кон националните и локалните донесувачи на одлуки, рече Зоран Илиески, тим лидер на проектот од Коалиција на младински организации СЕГА.

Александар Цеков, надворешен консултант, истражувач во Центарот за истражување и креирање политики (ЦИКП), истакна дека Индексот е алатка што е развиена со цел да прибере информации за положбата на младите во рамки на заедницата во која што живеат, како и да ги утврди предизвиците со кои што тие се соочуваат со цел да се идентификуваат прашањата од приоритетно значење за младите и врз основа на аргументирана анализа да се дадат препораки за нивно надминување преку процесот на креирање политики на локални ниво.

- Анализата на податоците добиени со оваа алатка, ќе овозможи младите поактивно да се вклучат во креирањето политики, како и во процесот на поставување на самата агенда за креирање политики од интерес на младите, рече тој.

Индексот е развиен врз основа на Глобалниот индекс за младински развој  и овозможува споредливост на резултатите, што пак дава можност за примена на добри практики во решавање на младинските прашања.