Промоција на „Јас и Лин, отпосле“ од Ана Стојаноска
На Факултетот за драмски уметности вечер ќе биде промовиран романот „Јас и Лин, отпосле“ од Ана Стојаноска во издание на „Блесок“.
- Откако романот беше пуштен во продажба во јуни 2016 година до денес, неговата промоција е водена на несекојдневен начин за македонската книжевна и издавачка практика. Првата објава е на социјалните мрежи и авторката побара од секој што ќе ја прочита да даде мислење, импресија, впечатоци во пишана или снимена форма. На тој начин, романот сам си ја диктираше својата промоција. Од собраните материјали е направен краток промотивен филм, што публиката ќе има можност да го види на самата промоција, соопшти издавачот.
Писателката Оливера Ќорверзировска во рецензијата за романот напиша дека романот „Јас и Лин, отпосле“ е „неодоливо, несовршен роман“, кој може да се дефинира како љубовен роман.
Меѓутоа, вели рецензентката, „оваа едноставна констатација колку што го опишува, исто толку и го навредува впечатливото и помамно прозно писмо зад насловот. Оти му е малку на текстот да биде љубовен, оти ѝ е малку на Стојаноска да биде само романсиер“.
Ана Стојаноска (1977), театролог, вонредна професорка на Факултетот за драмски уметности. Дипломирала на Филолошки факултет во Скопје, на отсекот за општа и компаративна книжевност (2001). Постдипломските студии по театрологија ги завршила на ФДУ, каде што магистрирала (2003) и докторирала (2007).
