Пролетна акција од кампањата „Македонија без отпад“ во Неготино

На три локации денеска во Неготино се реализира пролетната акција од кампњата „Македонија без отпад“, во организација на Министерството за животна средина и просторно планирање во соработка со Агенцијата за млади и спорт и општините со Јавните комунални претпријатија.

Заменик-министерот за животна средина и просторно планирање Стево Темелковски и директорот на Агенцијата за млади и спорт Марјан Спасески се приклучија во акцијата во Неготино и чистеа околу спортската сала „Младост“. 

- Во суштина оваа акција има две цели. Едната цел ја чини едукативниот аспект, подигнување на свеста кај граѓаните за да не оставаат отпад на несоодветни места. Да има едно регулирано управување со отпадот. Од друга страна, пак, во овие пролетни денови да направиме акција на чистење, да собереме отпад. Во моментов во Македонија се присутни многу такви мали диви депонии, нагласи заменик-министерот. 

Тој укажа дека пролетната акција е од помал обем.

- Акцијата „Македонија без отпад“ ја спрведуваме веќе петта година. Есенската акција ја спроведуваме во сите општини во Република Македонија, а пролетната ја таргетираме во неколку општини. Овој пат избравме две рурални и две урбани општини, специјалната мисија на чистење е Тиквешкото езеро, рече Темелковски.

Директорот Спасески потенцира дека активно се вклучуваат во акцијата со свои активисти, особено со познати и признати спортисти. 

- Сите заедно треба да упатиме апел дека не само при одбележување на вакви големи денови, како што е Меѓународниот ден за заштита на животната средина, туку и секој ден, сите луѓе со своето поведение треба да претставуваат пример како сите заедно треба да се грижиме за здрава и чиста животна средина, рече Спасески. 

Градоначалникот на Неготино Ванчо Апостолов рече дека годинава чистат на потегот од влезот од Скопје за Неготино, на булеварот се до спортската сала „Младост“.