Продолжува потрагата по двајца хрватски државјани затрупани во лавина во Словенија

Спасувачката акција под Тоск во Јулиските Алпи, каде што вчера лавина затрупа тројца хрватски планинари, денеска продолжува по паузата во текот на ноќта, јави словенечката агенција СТА.

Снежна лавина се случи вчера наутро во словенечките Јулиски Алпи, под врвот Тоск, и зароби тројца хрватски планинари, јавија словенечките и хрватските медиуми. Телото на еден планинар беше пронајдено вчера, а потрагата по преостанатите двајца синоќа беше прекината поради временските услови и продолжи утрово.

На планинските спасувачи им помагаат и кучиња-трагачи.

Како што изјави за СТА претседателот на Службата за планинско спасување во Бохињ, Миха Арх, кој е задолжен за спасувачката акција, во операцијата учествуваат спасувачи од Бохињ, Јесенице и Радовљица, како и од Здружението на кучиња водичи за спасување во Крањ. Тој рече дека во текот на ноќта собрале дополнителни информации и анализирале каде би можеле да бидат настраданите.

Доколку временските услови дозволат, особено маглата, во потрагата ќе помогнат и хеликоптери.

Седум хрватски државјани тргнаа кон врвот на Тоск во Јулиските Алпи. Четворица планинари останаа во домот на Водник во Вели Поље, додека тројца, и покрај лошите временски услови, го продолжија своето патување кон врвот каде што беа однесени од лавина што почна околу 10 часот, објави вчера Хина. Потоа почна спасувачката операција, која беше комплицирана поради лошите временски услови, кои го спречија хеликоптерот да полета.

Хрватскиот премиер Андреј Пленковиќ вчера на X напиша дека разговарал со својот словенечки колега Роберт Голоб откако дознал за снежната лавина што погоди група хрватски планинари во словенечките Јулиски Алпи.

Планинарското спасувачко друштво на Словенија истакна дека условите во планините се исклучително тешки. Количината на врнежи на планините е голема, а ризикот од предизвикување лавини е висок. Затоа, тие советуваат да не се посетуваат планините во наредните денови.

Полициската управа Крањ, исто така, предупреди на крајна претпазливост на планините и избегнување на пострмни снежни области додека ситуацијата не се смири и стабилизира. Условите веднаш по снежните врнежи се секогаш исклучително опасни. 

МИА