Продолжува културно-забавната програма во Охрид, одлична посетеност се очекува и за Божик

Одличната посетеност на Охрид за новогодишната ноќ локалната самоуправа ќе се обиде да ја продолжи и за претстојните божикни празници, но и за православната Нова година и за Водици, со разни манифестации и музичко-забавна програма.

До празникот Свети Јован Крстител, на 20 јануари, во градот секојдневно ќе се одржуваат и различни културно-забавни содржини, како на плоштадот така и кај лизгалиштето на мраз поставено во непосредна близина, на кејот „Македонија“.

Согласно програмата насловена „Охрид Ве очекува“, вечерва на градскот плоштад ќе настапува српскиот музичар и уметник Марко Луис. На сцената поставена на плоштадот уште е предвидено целовечерна забава на 5 јануари со ди-џеј Ванчо, како и џез, соул и фанк концерт на Владимир Василевски – Четкар на 11 јануари. Кулминацијата на програмата е на 18 јануари спроти Водици, со концертот на познатата хрватска музичка ѕвезда Петар Грашо. За Денот на рибарите – 20 јануари сцената на Градскиот плоштад е резервирана за македонската фолк-ѕвезда Миле Кузманоски.

Охридските хотелиери и угостители исто така за празничните денови ќе нудат поволни аранжмани, како и посебна понуда, како гастрономска така и музичка, со со цел што позадоволни гости кои ќе решат некои од овие празнични денови да ги минат токму во Охрид и на охридската ривиера.

Што се однесува на посетеноста, самите хотелиери посочуваат зголемен интерес на странските гости за божикните празници потврдено со бројот резервации и закупени капацитети. Како и за новогодишните, така  и за божикните празници најголем број од странските гости ќе бидат оние од соседните држави.