Продолжува изградбата на велосипедски патеки во Скопје

Продолжуваат градежните активности во рамки на мега проектот за изградба и реконструкција на велосипедските патеки „Скопје велоград 2017“.

Како што информира Град Скопје, екипите на Град Скопје и на ЈП „Улици и патишта“ деновиве работат на повеќе локации за оформување и асфалтирање на велосипедските патеки во рамките на овој проект.

Деновиве интензивно се работи на изградба на велосипедските патеки од Рута 2 од „Скопје велоград 2017“, каде се врши асфалтирање на велосипедските патеки по должината на булеварот „Партизански одреди“, во делот од поликлиниката „Букурешт“ кон трговскиот центар „Сити мол“. 

Рутата 2 е со вкупна должина од 11 километри и ќе ги поврзе општина Аеродром, преку општините Центар и Карпош, до општина Ѓорче Петров. Таа ги опфаќа булеварите „Февруарски поход“, „Видое Смилевски Бато“, „Јане Сандански“ и „Кузман Јосифовски Питу“, „Кеј 13 Ноември“, плоштадот „Македонија“, булеварот ВМРО и булеварот „Партизански одреди“ до Порта Влае.