Презентација и анкета за урбанистичките планови за четири населени места во Дојран

Градоначалникот на општина Дојран, Борче Стамов денеска донесе решение за одржување јавна презентација и спроведување јавна анкета за урбанистичките планови за населените места Николич, Црничани, Фурка и Ѓопчели во општина Дојран.

Од општина Дојран соопштија дека урбанистичките планови ќе бидат изложени на огласната табла во зградата на општината и на јавни места, поточно на излозите од трговските дуќани во центрите на населените места.

Почнувајќи од денеска јавната анкета ќе се спроведува наредните десет дена, заклучно со 28 декември, кога ќе се изврши и јавното презентирање на урбанистичките планови за Николич, Црничани, Фурка и Ѓопчели.

Во наведениот термин сите заинтересирани физички и правни лица од конкретните подрачја опфатени со урбанитичките планови можат да учествуваат во јавната анкета исклучиво преку анкетни листови на кои ќе ги достават своите мислења, забелешки и предлози.