Претседателски избори во Узбекистан

Во Узбекистан денеска се одржуваат избори за претседател на кои граѓаните ќе бираат меѓу четири кандидати. Еден од нив е актуелниот вршител на должноста шеф на државата и премиер Шавкат Мирзијоев.

Изборите се распишани откако претходниот претседател Ислам Каримов почина на 2 септември оваа година.

Покрај Мирзијоев, номиниран од Движењето на претприемачи и бизнисмени – Либералнодемократската партија на Узбекистан, кандидати се лидер на три останати официјално регистрирани политички здруженија во државата.

Станува збор за Котамјон Кетмонов од Народната демократска партија на Узбекистан, Сарвар Отамуратов од Демократската партија за национално заживување и Наримон Умаров од Демократската партија за социјална правда. Мандатот на претседателот на Узбекистан трае пет години.