Прекинат мечот на Ѓорческа на фјучрсот во Софија

По настапот во квалификациите на УС Опен најдобрата македонска тенисерка Лина Ѓорческа се врати на настапите на фјучрс турнирите. Таа денеска го почна мечот од 1.коло на фјучрсот во Софија (награден фонд 25.000 долари), но поради дожд дуелот е во прекин.

Нејзина противничка е Кимберли Цимерман од Белгија, која го доби првиот сет со 7:6 (8:6 на поени) во тај брекот. Ѓорческа беше подобра во вториот и изедначи откако го доби со 6:1 во гемови. Во решавачкиот сет резултатот е 1:1. Ако победи нашата тенисерка ќе игра и меч од 2.коло против Катинка Вон Дихман од Лихтенштајн, секако и меч во игра на двојки.

Продолжението од мечот е во 9.30 часот по локално време.

На турнирот настапи и уште една наша тенисерка Магдалена Стоилковска но елиминирана е по поразот од Мелани Стоке од Норвешка.