Преглед на вестите од светот

Порака на обединување и заеднички молитви за крај на насилството упатија Папата Лео и вселенскиот патријарх Вартоломеј на зедничката литургија која утрово ја служеа во седиштето на вселенската патријаршија во Фанар, Истанбул

Тие повикаа на обединување на христијаните и јасна осуда на војните

Утринската литургија е последна на агендата на Папата Лео во неговата неколкудневна посета на Турција пред да замине во Либан. 

Вчера во Истанбул папата одржа миса пред повеќе од 4.000 верници, а неговата служба беше одблиску следена од целиот христијански свет имајќи предвид дека папата кој неодамна го презема водството на католичката црква ги има своите први настапи надвор од католичкиот свет.

Се потензични стануваат односите меѓу САД и Венецуела. Откако вчера американскиот претседател го прогласи воздушниот простор над земјата за затворен, официјален Каракас потегот на нарече отворена агресија. 

Во соопштението изјавата на Трамп се квалификува како непријателски, едностран и произволен чин, кој е неспојлив со основните начела на меѓународното право.

Според извори од Каракас, владата на Николас Мадуро веќе  распоредила војска, полиција и милициски сили на 284 „борбени фронтови“

Четворица се убиени а уште 14 застрелани во пукотница на детски роденден во американската држава Калифорнија

Осомничениот напаѓач сè уште не е уапсен, а полицијата побара помош од јавноста. Детективите сè уште работат на утврдување на можниот мотив за инцидентот. 

Бројот на загинатите од разорната тропска бура што ја погоди југоисточна Азија порасна на повеќе од 500 лица, соопштија денеска официјални претставници. Поплавите и свлечиштата предизвикани од екстремните врнежи уништија голем дел од инфраструктурата во Индонезија, Малезија и Тајланд, а спасувачките служби продолжуваат со напорите да пристапат до најтешко погодените региони. Според првичните информации бурата загрозила повеќе од 4 милиони луѓе кои останале без своите домови или пак без пристап до електрична енергија. 

Паралелно со оваа, со сопствена трагедија се соочува и Шри Ланка каде циклонот Дитва зеде повеќе од 150 животи а близу 200 лица се уште се водат како исчезнати.