Преглед на вестите од светот

Најмалку едно лице загина, а седуммина беа повредени во руски напад врз Киев минатата ноќ, јавува Би-би-си. Експлозиите оштетија станбени згради во повеќе делови од градот, а два пожари беа изгаснати од екипите за итни интервенции.

Нападот доаѓа само неколку дена по слично бомбардирање во кое загинаа седуммина. Во меѓувреме, рускиот претседател Владимир Путин ги повтори условите за прекин на војната и најави дека следната недела Москва ќе прими американска делегација за разговори за мировниот документ.

Во меѓувреме Украина се соочува со внатрешен политички земјотрес откако најблискиот соработник на Зеленски, специјалниот советник Андриј Јермак поднесе оставката под силен притисок на обвинувањата за вмешаност во корупција

Полицијата во Хонк Конг стравува дека бројот на жртви во пожарот во станбениот комплекс може да надмине и 150 . Во моментов потврдени се 128 загинати додека бројот на исчезнати од 200 се намали на 150. 

Пожарот избувна во средата попладне и брзо зафати седум од осумте 32-катни згради кои беа обвиткани со бамбусово градежно скеле и заштитна мрежа поради реновирање.

Најмалку 123 луѓе загинаа а уште 130 се водат како исчезнати во налетот на циклонот Дитва кој предизвика големи поплави во Шри Ланка. 

Повеќе од 44.000 лица се раселени откако нивните домови биле уништени по интензивните врнежи кои траат веќе неколку дена. 

Надлежните предупредија дека поплавите, кои веќе зафатија голем дел од јужните и источните региони, вклучително и делови од главниот град Коломбо, би можеле дополнително да се прошират додека циклонот се префрли во јужните територии на Индија. 

Папата Лео ја посети Сината џамија во Истанбул во рамки на последниот ден од неговата посета на Турција. Тоа претставува неговата прва посета на муслимански верски објект како поглавар на Католичката црква

Првиот американски папа накратко се поклони пред да влезе во џамијата, а низ импозантниот комплекс, кој може да прими до 10.000 верници, го прошетаа имамот и истанбулскиот муфтија

Сината џамија официјално го носи името на султанот Ахмед I, владетел на Отоманската империја во 17 век. Украсена е со илјадници сини керамички плочки, по кои го добила популарното име.