Преглед на вести од светот

Бројот на Палестинци загинати во Газа се искачи на 38.295 во средата, а делегациите од Израел, САД и Египет ги продолжија во Катар на разговорите за примирје во Газа. Според здравствените власти во палестинската енклава, уште 88.241 лице се ранети.

Повикувајќи се на израелски официјални лица, израелските медиуми наведуваат дека целта на разговорите е да се финализира нацрт-договорот за прашањата за кои сите страни постигнале консензус и да се формулира детален договор, а исто така да се спроведат дополнителни консултации за преостанатите разлики.

Според извештаите на медиумите, сите страни постигнале консензус за првата фаза од сеопфатниот трифазен договор за прекин на огнот. Главната разлика е во тоа што Хамас бара од Египет, Катар и САД како посредници да дадат писмени гаранции за да се осигураат дека по завршувањето на првата фаза од сеопфатниот договор, сите страни ќе продолжат да преговараат на неодредено време за постојан прекин на огнот во Газа,

Американските власти рекоа дека разговорите во понеделникот меѓу Израел, САД и Египет во Каиро постигнале одреден напредок, додека израелските власти, исто така, рекоа дека постои шанса да се постигне договор, но претстојат тешки, комплицирани преговори кои би можеле да траат со недели.

Египетскиот министер за надворешни работи Бадр Абделати рече дека неодамнешните состаноци имале за цел да го запрат ова „тешко сценарио“ на либанскиот фронт.

Десетици илјади Израелци и Либанци беа принудени да се евакуираат од областа околу границата меѓу двете земји, а меѓународните набљудувачи во последните недели предупредуваа на зголемениот ризик од поширок конфликт.

Воздухопловните сили на Украина соопштија дека Русија лансирала две балистички ракети Искандер-М и шест беспилотни летала Шахед во нападот врз Украина денеска во раните утрински часови. Украинската воздушна одбрана соопшти дека ги соборила сите шест беспилотни летала лансирани од Русија над четири украински региони.

Остатоците од дронот предизвикале пожар на отворен простор, кој во меѓувреме е изгаснат, а жртви немало.

Властите во западните региони на Лавов, Ивано-Франковск и Хмелницки не пријавија жртви или штета на цивилната инфраструктура.