Потребна помош за семејството Митриновски од Пехчево чија куќа синоќа изгоре во пожар

Синоќа околу 23:30 часот по претходна дојава, Територијалната противпожарна единица од Берово учествувала во гаснење на пожар на семејна куќа во градот Пехчево. Според информациите на командирот на Територијалната противпожарна единица од Берово, Зоран Ајтовски, во пожарот учествувале две противпожарни возила со шест пожарникари.

– Се работи за пожар во кој изгоре куќа на улица „Пиринска“. Куќата е градена од тули и градежен материјал што е лесно запаллив. Пожарот бил доцна забележан и пријавен при што во моментот на пристигнувањето на нашата екипа поголем дел од куќата беше зафатена од пожар. За среќа, луѓето кои живеат во куќата се извлечени навреме, а со брзата интервенција спасени се и околните куќи, соопштува Ајтовски.

Според непотврдени информации, причината за пожарот била старата електрична инсталација, но истрагата допрва треба да утврди која е вистинската причина за пожарот што ги остави без покрив над главата семејството Митриновски од Пехчево.