Попис на водомери во Куманово

Четири екипи на Јавното претпријатие „Водовод" деновиве на терен спроведуваат втора фаза  од пописот  на водомерите на корисниците на услугите, опфаќајќи ги и правните субјекти и физичките лица.

Акцијата, како што информираат надлежните има за цел да ја  утврдат точната бројка на корисници во Куманово.

Пописот е обемен, соопштуваат од „Водовод“ и треба да се спроведе детално  во неколку фази  за да ги прикаже податоците со кои во иднина можат да се планираат приходите на претпријатието.

- Оваа е втора  фаза  од спроведувањето на пописот на водомери. Во моментов, екипите одат на терен во оние делови и населби од градот каде што корисниците користат и вода од „Водовод“, но и вода од   бунари и бушотини. Наша цел е да утврдиме која количина се троши од претпријатието, а колку од бунарите, за да добиеме податоци  за потрошувачката на вода во градот, изјави директорот на ЈП „Водовод“ Горан Стојковски.

Во централното градско подрачје, целосно е завршен пописот. Во поголемиот дел од градот евидентирани се домаќинства кои користат вода од претпријатието и кои во најголем процент редовно ги плаќаат сметките. И правните субјекти редовно си ги плаќаат сметките.

- Согласно нашата евиденција имаме зелена зона каде што состојбата е регуларна, жолта зона каде дел од корисниците велат дека користат и  вода од бунари и бушотини и портокалова зона каде што има евидентирано нелегални приклучоци за кои планираме да преземе соодветни мерки за приклучување кон системот, што подразбира и плаќање на обвските кон претпријатието, објасни Стојковски.

Оваа акција, според Стојковски е дел од сетот мерки кои се преземаат за да  се подобри ефикасноста на претпријатието и да се подобри квалитетот на услугите кон граѓаните.

ЈП "Водовод",евидентира 31.500 водомери,од кои 28.000 ги користат физичките лица,а 3.500 правни лица.