Поголем дел од Македонија утринава со температури под нулата

Во поголем дел од Македонија утринава се измерени температури под нулата. Најстудено било во Лазарополе каде минималната температури изнесувала - 8 степени, а најтопло во Гевгелија и Дојран каде се измерени 3 степени.

Според попдатоците на Управата за хидрометеролошки работи до 08:30 часот, освен во Лазарополе студено било и во Маврово и Крушево каде се измерени -6 степени, потоа во Берово -5, во Крива Паланка -4, во Пожаране и Битола -3, Тополчани, Виница, Ѓуриште, Охрид, Прилеп, Штип и Скопје Петровец -2 и Претор, Струмица и Демир Капија -1. Нула степени се измерени во Куманово, а 1 степен над нулата во Скопје.  

Снег од еден сантиметар сеуште има во Маврово.

Утринава времето е сончево со мала до умерена облачност. Малку повеќе облачност имало во Преспа и во јужните делови од Пелагонија. Понекаде дува слаб северен ветер.

Во текот на денот се очекува да биде сончево со мала до умерена облачност. Повеќе сонце ќе има во централните делови од земјата. Ќе дува слаб до умерен северен ветер, а долж Повардарието ветерот повремено ќе засилува. Температурата ќе се движи во интервал од 9 до 17 степени. Во Скопје слично време со температури до 15 степени.

Во следниве денови утринските температури полека ќе се покачуваат, а во вторник наутро се очекуваат позитивни утрински температури насекаде. Северниот ветер ќе продолжи да дува и за викендот, а повторно ќе засилува и тоа на север, по Повардарието и кон исток во недела.

Утре попладне ќе се зголемува облачноста и ќе има услови за слаб краткотраен дожд, а на планините од слаб снег преку ноќта. Дневните температури од недела брзо ќе се покачат и покрај повремените наоблачувања до крајот на следната работна недела, тие ќе се надминуваат 20 степени пред се на југоистокот.