Почна поставувањето на монтажна болница во Централ парк во Њујорк

На источната страна на паркот, која гледа кон болницата „Маунт Синај“, се наоѓаат 14 шатори, а ќе има и оддел за интензивна нега со респиратори. За пациентите ќе се грижи тим од лекари и медицински сестри, кој им помагал на заразените лица од ебола во Западна Африка, но и на сириските бегалци во Ирак и на погодените од земјотресот во Еквадор, пишува „Њујорк пост“.

Координаторот на здравствените работници Елиот Тенпени изјави дека очекува болницата да почне со работа за 48 часа.

САД, кои имаат 320 милиони население, досега имаат 142.196 заразени со коронавирус, а починале 2.479 луѓе. Најмногу позитивни на Ковид-19 во САД има во сојузната држава Њујорк и тој број денеска надмина 50.000 лица.

Во градот денеска ќе пристигне и воен брод-болница, каде има илјада кревети и неколку операциони сали. Освен тоа градските власти процениле дека наскоро ќе им бидат потребни и 140.000 кревети, заштитна опрема, респиратори и медицински персонал.

Градочалникот на Њујорк, Бил де Бласио најави дека 5 април ќе биде „Денот Д“ за градот.