Петровска – Балфорт: Потребен е брз почеток на прегвори на Северна Македонија со ЕУ

Западент Балкан мора да биде високо на агендата на Европската Унија. ЕУ мора да биде решителна и што поскоро да ги започне пристапните преговори со Северна Македонија, истакна денеска министерка за одбрана Славјанја Петровска на средбата со Јоанеке Балфорт, директорка за безбедносна и одбранбена политика на Европската служба за надворешно дејствување, која е во посета на Скопје.

На средбата, како што соопшти Министерството за одбрана, министерката Петровска се осврна на потребата за видлива и брза европска перспектива на земјите од регионот, која е исклучително важна особено во овие времиња на безбедносни предизвици на континентот.

Таа додаде и дека овој процес влијае и на кредибилноста на Унијата.

Петровска истакна дека заедничката безбедносна и одбранбена политика е уште една алатка за зацврстување на односите со регионот, а надворешната политика на Северна Македонија е целосно во согласност со оваа безбедносна и одбранбена политика на Унијата.

Балфорт од своја страна се согласи дека Северна Македонија е подготвена за почеток на преговори.

– Се надеваме дека ќе можеме брзо да ги започнеме пристапните преговори, што ќе даде исклучително позитивен импулс. Северна Македонија е подготвена за овој процес, порача Балфорт.

Таа се заблагодари за целосната усогласеност на надворешната политика на Северна Македонија со Заедничката безбедносна и одбранбена политика на Унијата.

Во однос на соработката помеѓу НАТО и ЕУ, Петровска и Балфорт заклучија дека и двете организации имаат заеднички предизвици кои бараат заеднички решенија. Тие истакнаа дека и НАТО и ЕУ мора да работат заедно на многу прашања, особено во градењето отпорност против заканите.

На средбата стана збор и за блиската соработка во градењето на капацитети во справувањето со хибридните закани и особено дезинформациите, како предизвик со кој се соочуваат и земјите од Западниот Балкан и членките на Унијата.

Северна Македонија од 2006 година дава свој придонес во операцијата ЕУФОР-АЛТЕА во Босна и Херцеговина, а од 2020 година е дел и од тренинг-мисијата на ЕУ во Централноафриканската Република.