Петнаесет заболени од грип во Делчево и Македонска Каменица

Петнаесет заболени од грип се регистрирани овој месец во Делчево и во Македонска Каменица. Од нив, 10 се од Македонска Каменица, а пет од Делчево.

Јелица Стојковска од епидемиолошката служба од Делчево изјави дека бројот на заболени од грип во овој период е значително помал споредено со минатата година.

Матичните лекари потврдуваат дека овој период има зголемен број на заболени со вирози.

- Имаме зголемен број на пациенти што е карактеристично за овој период од годината. Најчесто предизвикувачот на инфекции на горните дишни патишта во 90 отсто е вирус и станува збор за обични настинки предизвикани од риновирус, аденовируси. Инфлуенцата како тип на вирус доаѓа дури четврта по ред, а за кој тип на вирус се работи се докажува само лабораториски, истакна Соња Мавродиева-Ѓеоргиевска, специјалист по семејна медицина.

Таа апелираше до пациентите да не земаат антибиотици на своја рака.

- Ние како лекари сакаме да ја покренеме здравствената култура на нашите граѓани и да им докажеме на пациентите дека за вирусите се зема само симптоматска терапија, а не антбиотици кои не делуваат на вирусите, рече Мавродиева - Ѓеоргиевска.

Во Делчево и Македонска Каменица се вакцинирани 591 пациент, главно постари и изнемоштени лица и лица со хронични заболувања.