Пет стихозбирки во потесен избор за наградата „Браќа Миладиновци“

Жирито за доделување на наградата „Браќа Миладиновци“ избра пет поетски книги во потесен избор од пристигнатите 46 од  45 автори на конкурсот за најдобра поетска книга на македонски јазик издадена помеѓу две изданија на Струшките вечери на поезијата. 

Тоа се стихозбирките: „Морето ми е до колена“ од Јовица Ивановски, „Глагољубни песновиденија“ од Димитар Пандев, „Времено и трајно“ од Јован Стрезовски, „Посланија и риданија“ од Кочо Топузовски и „Светлината на Света Гора“ од Иван Џепароски. 

Од нив ќе биде избран добитникот на најпрестижното годишно национално признание за поезија во Македонија, кој ќе биде соопштен на прес-конференција на жирито на 26 август за време на одржувањето на годинашните Струшки вечери на поезијата.

Составот на жири-комисијата и понатаму ќе остане таен до донесувањето на конечната одлука.

- Согласно програмските измени од минатата година, во посебна програмска содржина ќе бидат претставени поетите чии книги се нашле во потесниот избор, соопшти дирекцијата на фестивалот.