Пет лица повредени во опожарена ТВ станица

Пет лица се повредени вчера кога група демонстранти влегле и ги запалиле просториите на ТВ станицата Интер во центарот на Киев, соопшти редакцијата на овој ТВ канал.  

Во соопштението се наведува дека повредените се хоспитализирани и дека многумина вработени во редакцијата претрпеле шок и се здобиле со изгореници по лицето.

Украинската полиција уапси шест лица осомничени дека учествувале во нередите и нападот врз ТВ станицата, вклучувајќи учесници во борбите во Донбас, како и поранешни војници.

Претходно вчера околу 20 лица поставија шатори пред зградата на ТВ станицата и почнаа да извикуваат пароли, со кои ги обвинуваа нејзините новинари за проруски ставови. 

Подоцна запалиле автомобилски гуми во близина на влезот, а петнаестина активисти упаднале во зградата и ја запалиле редакцијата.