Песна што носи љубов и надеж

СОС Детско Село со гордост ја претставува новогодишната песна која носи силна порака за љубов, надеж и припадност. 

Песната е создадена како посебена инспирација на нашите пријатели Мишел Трајковски и Јана Стојановска, со поддршка на многу наши познати личности, и е вистински доказ дека заедно можеме да создадеме магија.
Детскиот хор вклучен во рефренот внесува искреност и празнична радост што допира до секое срце силно пренесувајќи ја пораката дека секое дете заслужува љубов, грижа и семејна топлина.

„Нема поголемо задоволство од тоа да создадеш нешто што ќе ги направи децата среќни, а во исто време да ги поттикне возрасните да размислат за моќта на заедништвото и љубовта,“ изјавија Мишел и Јана, кои со оваа песна направија вистинско новогодишно чудо. „Учеството на нашите колеги е уште еден доказ дека сите можеме да се здружиме за да создадеме свет исполнет со добрина, особено за оние на кои им е најпотребно – децата. Бидејќи, секое дете е наше дете, а сите ние имаме морална и општествена одговорност да обезбедиме тие да растат во свет полн со љубов, грижа и поддршка.“

Спотот е исполнет со празнични сцени – од украсување на елката до заедничко пеење, симболизирајќи го домот и припадноста што секое дете ги заслужува. Овој проект е посветен на сите деца со порака за љубов и безгрижни празници. 

Песната ќе биде промовирана на социјалните мрежи, телевизии и радија, и СОС Детско Село ги повикува сите да ја споделат, да ја слушнат и да ја поддржат нашата мисија – секое дете да има среќно детство исполнето со грижа и сигурност.

„Оваа песна е нашиот начин да ја споделиме радоста на празниците и да ја испратиме пораката дека љубовта и поддршката се најубавите подароци за сите деца.“ изјавија од СОС Детско село.