Пешевски: Мерката за електрични возила ќе има позитивен ефект на животната средина

Вицепремиерот за економски прашања Владимир Пешевски оцени дека мерката за субвенционирање на електрични автомобили ќе има позитивно влијание врз животната средина.

Тој изјави дека во Буџетот веќе се алоцирани средства за реализација на оваа мерка која ќе почне да се применува од следната година и оти во годините кои следат средствата би можело да се зголемуваат доколку има интерес од граѓаните.

-  Лицата кои ќе ја искористат мерката ќе имаат низа на придобивки. За купување на возилата ќе добија субвенции од државата во висина до 5.000 евра, данокот на додадена вредност е намален од 18 процетни на 5 проценти и нема дополнителна акциза, регистрацијата на возилата ќе биде поевтина, нема да плаќаат патарини, ќе користат бесплатен паркинг на сите јавни паркинзи, како и низа други бенефиции, истакна Пешевски.

Според него, со мерките кои се предложени, граѓаните при купувањето на електричен автомобил, би заштедиле околу 20 проценти од вредноста на возилото.

Истражувањата, како што посочуваат надлежните, покажуваат дека во поглед на потрошувачката, електричните автомобили во однос на автомобилите кои користат фосилни горива се многукратно поевтини. Цената на чинење на електрична енергија која би ја потрошило електрично возило на 100.000 километри би чинела околу 1.000 евра, додека за возилата кои користат фосилни горива, а се со приближна или иста вредност при купувањето како електричните, за истата помината километража би требало да се издвои околу 50.000 евра, што на подолг рок претставуваат навистина голема заштеда за лицата кои ќе се одлучат да набават електричен автомобил.