Павлопулос: Решение на името и уставна ревизија за членство на ПЈРМ во НАТО и ЕУ

Решение на името што нема да шири иредентизам и уставна ревизија се предусловите за напредок на Македонија кон НАТО и ЕУ, според грчкиот претседател Прокопис Павлопулос.

Како што јави дописничката на МИА од Атина, и покрај вчера потпишаниот договор, за Павлопулос предусловите за европска и евро- атлантска интеграција остануваат исти. Своите ставови, ги повтори на средбата со неговиот индиски колега Рам Хат Ковинд.

- Предуслов за напредок во однос на НАТО и Европската Унија за поранешната југословенска Република Македонија е решавањето на името на оваа држава. Бидејќи е познато дека името што денес го има оваа земја, уставното име, шири иредентизам. Треба да се реши прашањето со името, така што ова име да не шири иредентизам. А за да се случи ова, ќе треба да има ревизија на нивниот Устав. Ова е прифатено од сите и од самата држава, како што произлегува од договорот, што беше потпишан вчера во Преспа, рече грчкиот претседател на почетокот на средбата со претседателот на Индија кој е во дводневна посета на Грција.

Прокопис Павлопулос повтори дека Грција се стреми кон пријателски и добрососедски односи, ја поддржува европската и евро - атлантската интеграција на Македонија, но само доколку се исполнат поставените и договорените услови.

- За каква било покана за оваа држава, за интеграција во НАТО, како и отпочнување на било какви суштински пристапни преговори со Европската унија, предуслов е финализирање на ревизијата на Уставот и само тогаш ќе можеме да разговараме за оваа перспектива, нешто, што како што е познато, беше договорено, додаде Павлопулос.