Откриена марихуана во средношколски интернат во Гостивар

По претрес кај еден малолетник кој престојувал во гостиварскиот средношколски дом (интернат), полицијата пронашла марихуана. Малолетникот е лишен од слобода и задржан во полициска станица во Гостивар.

Според СВР Тетово, денеска околу 12.40 часот, полициски службеници од Надворешната канцеларија за криминалистички работи Гостивар лишиле од слобода малолетник од село Требиште, општина Маврово и Ростуше.

– При претресот во интернатот, каде што престојувал, извршен со судска наредба во присуство на педагог, биле пронајдени и одземени марихуана и дробилка. Лицето било задржано во полициска станица и по целосно документирање на случајот, против него ќе биде поднесена соодветна пријава, наведуваат од СВР Тетово.

Извесна количина наркотична дрога (марихуана) била откриена и рано утрово во 04.00 часот на улица „211“ во Гостивар. Полициски службеници ги лишиле од слобода лицата С.А.(19), А.Г.(20), Н.Е.(18), тројцата од Гостивар, затоа што при преглед кај нив, кај С.А. била пронајдена и одземена марихуана.

Лицата се задржани во полициска станица и по документирање на случајот ќе следи соодветен поднесок.