Осуммина уапсени и одземена голема сума пари при операција против руски криминални структури во Шпанија

Шпанската полиција денеска соопшти дека уапсила осум лица осомничени за организиран криминал - перење пари, а одземени се парични средства и недвижен имот во вкупна вредност од 62 милиона евра.

Осомничени се четворица Руси, двајца Украинци и двајца Шпанци - одговорни за незаконска трговија со недвижнини во каталонската крајбрежна област Коста Дорада, во североисточна Шпанија.

Во рамките на акцијата се одземени 191 објект, а блокирани се 142 банкарски сметки. Осомничените утринава се уапсени во градовите Реус, Камбрилс и Сало во провинцијата Тарагона, на околу 100 км јужно од Барселона.

Пред девалвацијата на руската рубља, многу Руси купија имоти во Шпанија, искористувајќи ги првите знаци од глобалната рецесија коишто доведоа до паѓање на цените на недвижнините во Шпанија уште пред 2008 г. Недвижни имоти главно се купуваа во Каталонија и Андалузија.