Основните училишта во општина Новаци подготвени за новата учебна година

Основните училишта во општина Новаци подготвени се за стартот на новата учебна година. Според градоначалникот Лазар Котевски, реконструирани се повеќе училишта, уредени се дворните места, а во ЦОУ „Славко Лумбарковски“-Новаци, за прв пат по подолго време ќе учат 26 првачиња.

- Новата учебна година започнува в понеделник, на 4 септември, а во општина Новаци привршуваат последните подготовки околу средување на училиштата, дворните места и просториите за изведување на настава. Ги средуваме училниците, варосуваме, ставаме нов мебел. Во централното основно училиште „Славко Лумбарковски“ за прв пат школувањето ќе го почнат 26 првачиња, истакна Котевски.

Од општина Новаци информираат дека деновиве се врши расчистување на просторот и отстранување на стариот руиниран објект во дворот на ЦОУ „Славко Лумбарковски“-Новаци, и на негово место ќе се гради еколошко едукативен парк за настава во природа т.е. еко паркче.

- Во завршна фаза се и подготовките за старт на новата воспитно учебна година во Центарот за ран детски развој „Бамби“ во Новаци за кој е во тек е постапка за пренамена во детска градинка, потврди Котевски.