Општина Новаци ќе соработува со канцеларијата на UN Women во Македонија

Општина Новаци ќе биде дел од третата фаза од регионалниот проект на UN Women за промоција на родово одговорни политики и буџети во Југоисточна Европа, кој предвидува широка компонента насочена кон единиците на локална самоуправа во Македонија.

Градоначалникот на општина Новаци, Лазар Котевски истакна дека главната цел на проектот е да придонесе кон имплементација на националните обврски за остварување на родовата еднаквост и тој претставува продолжение на досегашните напори и постигнувања во насока на интегрирањето на родовата перспектива во креирањето на политиките и буџетите.

-Имајќи ја предвид досегашната успешна работа на општина Новаци на полето на родовата еднаквост, канцларијата на ОН за родова еднаквост и зајакнување на жените изрази желба за вклучување на општина Новаци во регионалниот проект за промоција на родово одговорни политики и буџети. Се надеваме дека преку поддршката обезбедена во рамките на проектот ќе ги зајакнеме капацитетите на општинската администрација и советот за родово одговорно креирање политики и да придонесеме кон унапредувањето на родовата еднаквост во општина Новаци, посочи Котевски.

Проектот ќе се реализира во периодот 2017-2018 година, со финансиска поддршка од Австриската развојна агенција и Швајцарската агенција за развој и соработка.

Во третата фаза од проектот ќе се вклучат десет нови македонски општини со цел да извршат зајакнување на општинските капацитети и механизми за имплементација на локалните и национални стратешки документи во областа на родовата еднаквост и родово одговорното буџетирање, како што се Стратегијата за родова еднаквост (2013-2020), Стратегијата за воведување родово одговорно буџетирање (2012-2017) и Законот за еднакви можности на жените и мажите.