Општина Гевгелија спроведе акција за чистење на спомен-шумата

Mасовен одѕив од граѓани, невладини организации, граѓански здруженија, вработени во локалната самоуправа и од јавното комунално претпријатие имаше еколошката акција за чистење на некогашниот „Армиски парк“, што ја организира Општина Гевгелија.

Акцијата целосно беше посветена на чистење на просторот во кругот на некогашната касарна и на споменикот кој потсетува на еден трагичен настан од Втората светска војна кога биле стрелани седум млади луѓе од Гевгелија и околината.

–На ваков начин заедно треба да ја демонстрираме грижата кон сите споменици од војните кои се воделе на овие простори и истовремено да даваме придонес за чиста и зелена Гевгелија,рече градоначалникот Сашо Поцков.

За чиста и поубава Гевгелија,од општината најавија одржување на редовни месечни и квартални еколошки акции заедно со граѓаните на општина Гевгелија.