Одобрени нови 10 милиони евра директна помош за земјоделците

На 19-тата седница синоќа Владата даде согласност за распишување за давање закуп на земјоделско земјиште во државна сопственост за површини до три и над 3 хектари. На седницата се донесени измени на Предлог-програмата за финансиска поддршка во земјоделството како и Програмата за рурален развој со кои се издвоија нови 10 милиони евра директна поддршка за земјоделците.

Како што информира владината прес-служба, пред министрите беше и информацијата за очекувано производство и откуп на пченица и јачмен. Донесени се  заклучоци со кои се задолжува Министерството за земјоделство, шумарство и водостопанство да изработи предлог програма за изменување и дополнување на Програмата за финансиска поддршка на земјоделството во 2017 година и предлог Уредба за изменување и дополнување на Уредбата за директни плаќања во земјоделството за 2017.

- Министерството за земјоделство, шумарство и водостопанство доби задолжение од Владата да изработи предлог за изменување и дополнување на Законот за квалитет на земјоделски производи во делот на одредбите кои го уредуваат пазарот на брашно, соопшти владината прес-служба.