Обвинителството на Босна и Херцеговина добило бројни пријави за незаконитости во врска со изборниот процес

На денот на општите избори во Босна и Херцеговина, на 2 октомври, како и во периодот пред и потоа, Обвинителството на БиХ примило и евидентирало одреден број пријави поврзани со наводи за незаконитости и нерегуларности во врска со изборен процес.

Обвинителството соопшти дека во меѓувреме пристигнале повеќе извештаи од Централната изборна комисија на БиХ (ЦИК) и Агенцијата за истрага и заштита (СИПА), како и од граѓани.

Обвинителството на Босна и Херцеговина нагласи дека заедно со партнерските институции и агенции ги проверуваат наводите од извештаите, како и дека во случаите поврзани со пријави за незаконитости и нерегуларности во изборниот процес на ниво на ентитети, ентитетските судски институции и полициските агенции се надлежни и постапуваат.

„Кога станува збор за изборниот процес за претседател на РС, тоа е во надлежност на републичките и окружните јавни обвинителства во РС, а Обвинителството на Босна и Херцеговина, во случај на потреба, ќе обезбеди секаков вид асистенција и помош согласно законот“, соопштуваат од Државното обвинителство, пренесува агенцијата Фена.

Кривичниот закон ги дефинира казните за кривичните дела поврзани со изборите кои се однесуваат на ускратување на избирачкото право, повреда на слободниот избор на избирачите, измама при гласање, повреда на тајноста на гласањето, изборна измама и уништување на изборна исправа. Предвидените казни се движат од парични до затворски казни од три месеци до пет години.