Нишани: Потпишувањето на спогодбата историски настан за Косово

Претседателот на Албанија, Бујар Нишани во телефонски разговор со неговата косовска колешка Атифете Јахјага, и го честитал потпишувањето на Спогодбата за стабилизација и асоцијација со ЕУ, оценувајќи го овој чин како историски настан за Косово во односите со ЕУ.

- Потпишувањето на оваа спогодба претставува силна поддршка и израз на доверба кон иституциите на Косово, камен темелник за неговата интеграција и натамошниот напредок во европските и евроатланските структури, рекол Нишани.

Тој искажал верба дека овој момент ќе послужи како поттик и катализатор за продолжување на неопходните реформи во сите области. Нишани исто така смета дека потпишувањето на спогодбата е одлична вест за целиот регион, за неговата заедничка европска иднина,вкако и за мирот и стабилноста на Западен Балкан.

Честитајќи и на Јахјага, а преку неа и на Владата и народот на Косово за овој голем успех, шефот на албанската држава, Нишани, рекол дека има силна верба и во зачленувањето на Косово во УНЕСКО, како и во други регионални и меѓународни организации, искажувајќи целосна поддршка од Албанија за Косово за секој негов чекор.