Николов: Има многу можности за напредок во краток рок

Бугарскиот министер за енергетика, Александар Николов истакна дека главната цел на средбата во Софија е да се најде полесен и поефективен начин на којшто Бугарија и Северна Македонија ќе комуницираат за енергетските пазари и неговата трговија.

– Засега не е вклучена темата за декарбонизација на зелената енергија и обновливите извори на енергија, а за подобрување на енергетското поврзување имаме поддршка од бугарскиот гасен оператор, рече Николов и додаде дека има многу можности за напредок на краток рок.

Со својот македонски колега министерот за економија Крешник Бектеши, како што јави дописникот на МИА од Софија, ќе разговараат за овие детали, како и за нестабилноста на цените на енергенсите и што може да се направи.

Николов додава дека е директно одговорен за трговијата, цените и трговските односи. Според него, интеграцијата на пазарите кои се градат на отворен принцип ќе биде прилично индикативна за тоа како Северна Македонија може да направи доста брз напредок во започнувањето на преговорите со Европската Унија.