Невработеноста најголем проблем за Ромите во Кичево

Меѓу најгорливите проблеми за Ромите во Кичево е невработеноста, а  проблемот може да се надмине со спрега меѓу локалната и централната власт, сметаат ромските невладини здруженија.

 

-Инклузијата на најмладите Роми во процесот на образование ги дава резултатите, но, сепак, неопходно е некои од граѓаните со преквалификации, доквалификации и други мерки да бидат конкурентна работна сила на пазарот на трудот. Тоа значи да конкурираат рамноправно на огласите за работа и да дојдат што побрзо и до соодветно работно место, изјави Емин Мамудоски од невладиното здружение „Преродба”.

 

За невработеноста на Ромите зборуваше и градоначалникот на општина Кичево Фатмир Дехари при презентација на предлог буџетот на општината за нардната година.

 

-Во склад со моите можности сум се трудел, но и ќе се трудам и во иднина во Кичево да имаме еден вид позитивна дискриминација барем при сезонските вработувања каде ни се дава можноста да вработиме во поголем дел припадници на Ромската заедница која е најранлива не само во Кичево, туку и пошироко рече Дехари.

 

Тој нагласи дека за ова заедница се отворени вратите и во општинската администрација, но додаде дека то многу тешко оди поради превработеноста која е наследена.

 

Во општина Кичево се ангажираат околу 50 сезонски работници скоро секоја година од кои најголем број се преставници на ромската заедница.