Нетанјаху: Интересите на Израел ќе бидат задоволени за време на втората фаза од мировниот план

Израелскиот премиер Бенјамин Нетанјаху вчера изјави дека за време на втората фаза од мировниот план на американскиот претседател Доналд Трамп за Газа, ќе бидат задоволени политичките и безбедносните интереси на Израел.

„Сега се фокусираме на завршување на двете преостанати мисии, демонтирање на оружјето на Хамас и демилитаризација на Газа, оружјето и тунелите“, рече Нетанјаху, според „Тајмс оф Израел“.

Тој рече дека се согласува со Трамп дека „постојат само две опции“.

„Или ова ќе се направи на лесен начин или ќе се направи на тежок начин, но во секој случај, ќе се случи. Веќе слушам изјави дека ќе дозволиме реконструкција на Газа пред демилитаризацијата. Тоа нема да се случи. Слушам дека ќе внесеме турски војници и катарски војници во Газа. Ниту тоа нема да се случи“, нагласи Нетанјаху.

Нетанјаху, исто така, рече дека има гласини дека ќе „дозволи формирање палестинска држава во Газа“, што исто така го негираше.

„Тоа не се случило и нема да се случи. Мислам дека сите знаете дека јас, заедно со моите колеги во владите што ги водев, постојано го спречувавме воспоставувањето палестинска држава. Дури и денес, или утре, нема да го дозволиме тоа. Израел ќе ја задржи безбедносната контрола врз целата област од реката Јордан до морето, а тоа го вклучува и Појасот Газа“, заклучи Нетанјаху.

Тој го повтори предупредувањето што му го упати на Иран минатата недела дека ако таа земја го нападне Израел, Ерусалим ќе одговори силно.

„Вистина е дека иранската оска се обидува да се опорави, но ние нема да ѝ дозволиме да го стори тоа. Ако Иран направи сериозна грешка и го нападне Израел, ние ќе одговориме со сила каква што Иран никогаш порано не ја видел“, рече Нетанјаху.

МИА