НБА: Г. Стејт и натаму непоразен

Кошаркарите на Голден Стејт ја продолжија победничката низа во НБА, откако против ЛА Клиперс ја забележаа 13-та победа од почетокот на сезоната. Голденс Стејт, во Лос Анџелес, надополни негатива од 23 поени и на крајот славеше кај Клиперси со 124:117.

 

Мечот во „Стејплс центарот“, Клиперси го отворија со 41 поен во првата четвртина, од кои 18 постигна Крис Пол. Сепак актуелните шампиони со серијата од 8:25 се вратија во натпреварот.

 

Во финишот, најпрвин Томпсон погоди тројка за предност на Голден Стејт (112:113), потоа возврати Крофорд, која ја поништи Кари (115:116). Во самата завршница Кари погоди четири слободни фрлања за нова победа на единствениот тим кој сеуште нема пораз во шампионатот.

 

Кошаркарите на Голден Стејт, во последните пет минути имаа 10 поени негатива но погодија осум тројки од девет обиди.

 

Стеф Кари одново го предводеше својот тим со 40 поени (11/22 од поле), 11 скокови и четири асистенции, но и седум загубени топки. На учинокот на Кари се надоврзаа Клеј Томпсон со 25 и Херисон Барнс со 21 поен.

 

Крис Пол кај Клиперси постигна 35, а Блејк Грифин 27 поени.

 

Двејн Вејд (24 поени, 6 скока, 5 асистенции) и Крис Бош (23 поени, 11 скокови) го предводеа Мајами до победата над Сакраменто со 116:109. Најдобри кај Сакраменто, во чии редови го немаше суспендираниот Демаркус Казинс, беа Марко Белинели со 23 поени, односно Режон Рондо со 14 поени и 18 асистенции.

 

Кливленд лесно слеваше во дуелот со Милвоки (115:100). Леброн Џејмс (27 поени, 9 скока, 6 асистенции) и Кевин Лав (22 поени, 15 скокови) беа најефикасни во деветтата победа на Кливленд. Милвоки го предводеше Јанис Антетукомпо со 33 поени.