НАСА: Нови докази за постоење на вода на јупитеровиот сателит Европа

Американската Национална администрација за аеронаутика и вселена (НАСА) објави видеа, направени со помош на телескопот „Хабл“, на кои се прикажува дека на јупитеровиот сателит Европа постои океан исполнет со вода, кој се наоѓа под неколку километарски дебел слој на мраз. 

Научниците наведоа дека е можно да постои вода и на површината на Европа, како и дека нашле можни докази за постоењето на вода и на другите јупитерови природни сателити. 

Пол Херц, директорот на одделението за астрофизика, истакна дека е задоволен со откритието и дека конечно на прашањето дали постои живот надвор од Земјата може да понуди научен одговор. 

- Таму каде што има вода на Земјата, има и живот и хранливи материи, а со оглед на тоа дека е пронајдена вода на Европа, тоа значи дека таму има и живот, нагласи Херц. 

Тој наведе дека ова откритие ја зголемило можноста дека водата и хранливи материи од сокриените океани на Европа, можат да се најдат и на нејзината површина, и дека НАСА ќе ја проучи можноста за слетување на сателитот на Јупитер, со цел да направи повеќе истражувања. 

Минатата недела, НАСА најави дека ќе одржи телефонска конференција на која ќе ги обелодени изненадувачките активности кои се случуваат на Европа, еден од 67-те природни сателити на Јупитер.