Најмалку едно лице загина во пожарите во Небраска

Најмалку едно лице загина, а речиси 800.000 хектари земја изгореа во големи шумски пожари што ја зафатија Небраска за време на топлотниот бран на западот од земјата.

Гувернерот на Небраска, Џим Пилен, рече дека четирите големи пожари што беснеат од минатата недела се „најголемите шумски пожари во историјата на државата“, јави Ен-Би-Си.

Пожарите беа поттикнати од ниската влажност и силните ветрови што достигнаа брзина до 98 километри на час во текот на викендот.

Жртва на пожарот е Роуз Вајт (86), од Артур, која загинала обидувајќи се да избега од пожарот во областа Морил. Пожарот, именуван по таа област – Морил, е најголем меѓу погодените области и изгоре повеќе од 570.000 хектари, додека околу 18 проценти од пожарот е под контрола.

Пожарот Котонвуд изгоре повеќе од 131.000 хектари и е делумно локализиран, додека пожарите на патот 203 и мостот Андерсон сè уште горат.

Повеќе од 700 пожарникари, припадници на Националната гарда на Небраска и Ајова, како и федерални агенции, вклучувајќи ја и Федералната агенција за управување со вонредни состојби, се борат со пожарите. Властите претходно евакуираа околу 300 жители од погодените подрачја, а гувернерот прогласи вонредна состојба во окрузите погодени од пожарите и потпиша извршна наредба за забрзување на снабдувањето со храна и други залихи за сточарите, додека пламените јазици ги зафатија пасиштата.

МИА