Над сто загинати на Хаваи, околу 1.300 лица се водат како исчезнати

Американскиот претседател Џо Бајден изјави дека ќе отпатува на Хаваите „што е можно побрзо“, по критиките за неговиот одговор на смртоносните шумски пожари на островот во кои загинаа повеќе од 100 луѓе, јавува денеска Би-би-си. Говорејќи во Милвоки вчера, Бајден рече дека сака да се погрижи луѓето во државата да имаат „сè што им треба“.

Бројот на загинати во пожарите сега е 101, додека околу 1.300 лица се водат како исчезнати. Жителите на Хаваи се пожалија на брзината на одговорот на федералната влада на катастрофата. Претседателот вчера рече дека сè уште не ги посетил Хаваите поради загриженост дека тоа ќе ги оттргне ресурсите и вниманието од хуманитарниот одговор.

„Не сакам да пречам. Сум бил во премногу области на катастрофа“, рече Бајден.

„Сакам да бидам сигурен дека нема да ги нарушиме тековните напори за закрепнување“, додаде тој. Повеќе од 500 луѓе, федерален персонал за итни случаи досега се испратени да помогнат во напорите за помош, вклучително и 150 специјалисти за пребарување и спасување.