Националните галерии на Македонија и Албанија потпишаа меморандум за соработка

Директорката на Национална галерија на Македонија Дита Старова Ќерими и директорот на Национална галерија на Албанија Артан Шабани потпишаа меморандум за соработка на двете установи. 

На потпишувањето вчера во Албанија присуствуваа и државниот секретар на Министерството за култура на Македонија Бехиџудин Шехаби и заменик министерот за култура на Албанија Зеф Чуни.

Како што соопшти денеска Национална галерија на Македонија, соработката има за цел ставање во функција на просторните и интелектуалните ресурси на двете институции за реализација на проекти, истражувања, уметнички престои, семинари, предавања и слично.

Директорката Дита Старова Ќерими и државниот секретар Бехиџудин Шехаби при посетата имале средба и со  министерот  за култура на Албанија Мирела Кумбаро Фурџи, на која е разговарано за билатералната соработка помеѓу двете земји, со особен акцент на културата и соработката помеѓу двете институции која ќе отпочне со воспоставување на реципрочна културна соработка, базирана врз размена на идеи, искуства, знаења и програми.

На средбата е договорена и размена на изложби, искуства во менаџмент со културни институции, соработка во сферата на уметничката и кураторска едукација, престои на уметници и на куратори, усовршувања или истражувачки проекти, консултации во сферата на уметноста, едукацијата и соработка на други полиња на интерес.