На „Ало докторе“ досега 45.330 повици.

Скопје, 4 август 2015 (МИА) - На телефонската линија 02 15123 за медицински совет „Ало докторе“ од 15 септември кога почна да работи, до 1 август, имало 45.330 повици.

Здравствен дом Скопје соопшти дека од 27 јули до 1 август на линијата за медицински совет се јавиле 1.175 лица. Линијата е достапна секој ден 24 часа со цел да се овозможи непосредна медицинска консултација во моментот на појава на какви било симптоми на нарушување на здравјето.

Дваесет и двајца доктори се достапни за медицински совет, а јавувањата се од граѓани од сите градови на Македонија.

На сите оние лица кои се јавиле на телефонската линија „Ало докторе“ им е дадена соодветна медицинска помош преку здравствен совет и соодветна симптоматска терапија.

Јавувањата во последната седмица се со широк спектар на најразлична симптоматологија, најчесто за кардиоваскуларни и респираторни симптоми, главоболки, стомачен вирус и симптомна болка.

Поради високите температури многу често се јавуваат граѓани за совети и препораки поврзани со топлото време, заштита од сонце и совети околу терапијата за хронични болести.