Москва ја повика Анкара да се врати кон мирно решавање на курдското прашање

Москва ја повика Анкара, поради катастрофалните последици од операцијата на турската војска во југоисточниот регион на земјата, колку може побрзо да се врати кон мирно решавање на курдското прашање, изјави денеска Марија Захрова, портпаролката на руското Министерство за надворешни работи, јавува ТАСС. 

Таа посочи на ситуацијата во Турција, бидејќи наскоро во Истанбул ќе се одржи Светскиот самит за хуманитарни прашања. 

Захарова посочи, дека според официјалните податоци, од јули 2015 година во зоната на антитерористичките операции загинале над 300 жители, и дека секојдневно пристигнуваат информации за нови жртви. 

- Пред неколку дена високиот комесар на ОН за човекови права ја осуди операцијата на турските сили за безбедност, и повика да се разгледаат информациите за нарушување на човековите права, особено оние дека не се дозволува пристап на медицински персонал до ранетите, нагласи Захарова.