Мнангагва се врати во Зимбабве, апсења во опкружувањето на претседателот Мугабе

Поранешниот вицепремиер на Зимбабве Емерсон Мнангагва се вратил во државата, јавија западни медиуми повикувајќи се на извори блиски до него.

 

– Да тој се врати вчера, изјави извор близок до Мнангагва и поврзан со армијата која го држи Мугабе во домашен притвор. 

 

Мнангагва избега од Зимбабве по отстранувањето од функцијата на 6 ноември, но вети дека ќе ја оспори власта на Мугабе и неговата сопруга Грејс. 

 

Армијата која го контролира Хараре соопшти денеска дека уапсила неколку луѓе блиски до претседателот Мугабе во операцијата за „чистење“ на редовите на владејачката партија Африкански национален сојуз на Зимбабве, Патриотски фронт ЗАНУ-ПФ.

 

– Приведовме неколку криминалци додека некои се уште се на слобода. Во моментот преговараме со Мугабе за следната етапа и ќе ве информираме благовремено за исходот од разговорите. Ја повикуваме нацијата да го задржи мирот додека трае нашата операцијата, соопштија од армијата.

 

Мугабе вчера во разговор со командантот на ГШ на армијата Константино Чивенга рече дека не сака да се повелече од функцијата.

 

Раководителите на ЗАНУ-ПФ денеска ќе имаат состанок на кој ќе подготват Резолуција за отстранување на Мугабе од лидерската позиција викендов и за импичмент следната недела ако тој доброволно не се повлече, изјави висок извор од партијата.

 

– Нема назад. Ако се спротивставува, ќе организираме негово отстранување в недела, а во вторник ќе има импичмент, додаде тој